大生銀行家族後人馬清偉早排俾本報踢爆，不堪前妻薛芷倫日日返屋企煩住，所以同啲仔女一家搬去酒店住，後來兩公婆就齊聲解畫，話係因為山泥傾瀉警告先暫避。
細路食二手雪茄
噚日馮仁昭又見到馬清偉一個人喺酒店做湊仔公，佢帶住三個仔女，五點左右喺置地廣場歎hightea，歎足個幾鐘。後來重遇到鍾鎮濤（阿Ｂ）同女友范姜、仔女嘉湄、嘉浚齊齊坐埋隔籬枱，兩家人大有大傾，細有細玩，睇嚟非常熟絡。隔兩張枱，又見到狄波拉同乖女謝婷婷密密傾。
後來馬清偉啲仔女走先，馬清偉身邊就換咗一個二十幾歲、白衫鴨舌帽嘅女伴繼續傾，坐到六點幾先走。馬清偉家庭樂本來幾幸福，不過佢冇停過口歎大雪茄，一支駁一支，難為兩家細路食足全場「二手雪茄」，認真唔健康。