「豬肉」在前，「淡水魚」在後，新鮮食品最近屢現問題，主婦日日也要面對「今晚煮乜餸」的難題，惟有改買罐頭食品。有食家建議，其實可暫時好好利用罐頭食品，「唔好以為係捱罐頭，只要花啲心思，都可以撚出巧手小菜！」有業界人士估計，罐頭食品生意料會增加一至兩成。
雖然曾特首公開「表演」吃淡水魚，但不少人仍對吃內地淡水魚有所保留。香港罐頭洋酒伙食商會副監事長李廣林預料，部份罐頭魚及肉類銷量將因消費者減少吃淡水魚等而微增，「罐頭幾時都係有解決糧食問題嘅作用啦。」他指罐頭食品經高溫處理，若罐內有細菌滋生罐身會凸起，「一眼就睇到。」而且罐頭多詳列用料及來源地，「咩事都可以追查到。」
愛吃魚的，或會選擇受歡迎的罐頭豆豉鯪魚，食家劉健威說：「好多人就咁加熱就食，梗係覺得唔係咁滋味啦。」他建議，可將罐頭豆豉鯪魚炒蔬菜，其中尤以苦瓜最合味，「用番啲豆豉嚟炒苦瓜，之後加埋啲魚炆一分鐘，啲魚會無咁鹹，但就吸收咗苦瓜嘅甘味。」他說罐頭魚魚身較鬆化，吸力更強。
另外，罐頭沙甸魚也可炮製成撚手小菜，劉健威將一條小小的辣味沙甸魚攪碎，並加入切粒的罐頭青瓜，然後釀入吊筒內，「用鹽水或熱開水浸一浸吊筒，就唔會縮埋，魚味亦會滲入吊筒。」他指出，烹飪不應一成不變，可隨意將罐頭沙甸魚換成罐頭牛肉，而罐頭午餐肉炒苦瓜，番茄沙甸魚炒番茄蛋等的效果也不俗。
「食嘢要持開放態度」
看着兩碟香氣撲鼻、各只花十多元的罐頭小菜，他說打算將兩者放入其私房菜館餐牌，「食嘢要持開放態度，唔好以為罐頭就一定係渣嘢。」
不過，劉健威說無論罐頭或新鮮食品都有可能出問題，所以最重要還是政府做好把關工作，「我哋政府就係太後知後覺，成日都唔可以早啲發現食物問題，搞到我哋無嘢好食！」
逢周二刊出
