是日窩輪市場遍地屍骸，跌幅18%至55%嘅C輪，超過50隻。恒指由低位回升103點，埋單唔見145點，冇咁難睇。期指今日結算，仍然低水58點，表面上嗰樣重係唔多好。過埋明日場外期指結算後，估計個市會較為明朗。呢幾日，趁個市軟軟哋低買C輪。
滙控C輪9026：滙控（005）再跌70仙，由月中129.50元到𠵱家124.30元，冇咗5.2元，預期PE亦得番13倍多少少，唔貴。過去個幾月，滙控幾次落到123元即告止跌回升，吼呢個位揀啲遠期C輪博下。9026嘅對沖值係48%，按正股跌70仙同埋隻輪對沖值計，輪價理論上應跌3.4仙，但隻輪昨日實際跌夠7仙，幅度14.7%，跌凸1倍。吼位買9026，有機會賺得多啲。
9026明年4月中夠鐘，溢價3.7%，槓桿率30.7倍（上周五26.3倍，因為昨日跌突，所以槓桿率上升），有效14.8倍。引伸波幅亦靚，得11.8%。
國壽P輪4859：國壽（2628）跌15仙，P輪4859由2.6仙彈上3.9仙，升幅50%。隻輪11月初到期，行使價5.25元。正股（現價6.05元）要兩個月內散80仙，隻輪最後先有得剩，追唔過。
章盛