經紀陳品題的看通集團（1059），雖然真係炒到飛起，但噚日才入市追貨的股民，睇嚟冇乜着數。
看通噚日一開市就見全日最高位0.80元，其後一度急回至0.60元，收市抽番上去0.68元，升70％，成交股數8788萬股，金額6085萬元。睇隻股咁嘅走勢，似乎有春江鴨趁好消息沽貨獲利。
不過，據講公司仍然好積極引入投資者，正搞緊推介活動。
另外，一直sell開自由行概念嘅利福國際（1212），昨日在收市後傳出配股，集資近10億元咁多。由於配售代理係近排相當活躍嘅德資行，所以小初並唔擔心利福去唔到貨，只係隻股復牌嘅表現，就真係唔敢講。
利福股價近月來一直保持強勢，今次批股雖然有折讓，但計落都成十幾倍PE，唔算得特別抵，加上涉及大銀碼，復牌後若有沽壓，一啲唔出奇。
與此同時，同系的華人置業（127）昨日公布中期業績，盈利較去年勁升236％，有成19.62億元，但派息只得9仙咁大把。
慕容小初