八方早前講過，如果曾慶紅副主席九月九日來港，而長毛梁國雄又剛好喺海外考察未返，咁就發達咯。可惜事與願違，阿牛曾健成同八方透露，長毛八號回港，而就算佢趕唔切，都有民主救港力量（老董下台前叫民主倒董力量）喺度恭迎曾副主席。
阿牛重話，曾副主席唔應該嚟香港只睇美國老鼠而唔理「本地牛」，佢哋都好想同曾副見見面。
曾副主席訪港日期冇人肯確實，但係唔緊要啦，煲呔周五都上京啦，到時咪一齊南下囉。八方聽聞，曾慶紅今次除咗前來挺曾，重會順道南巡。
其實阿牛同曾副有共同之處，就係前者日日喊倒董，後者真正以行動將老董拉下馬，所以阿牛都識英雄重英雄，決定去迎接佢嚟香港，等佢親身體驗吓香港民情。
阿牛一腔熱情，八方唔好意思潑佢冷水，因為曾大人一到，肯定保衞森嚴，佢都唔知埋唔埋到身，未見到佢廬山真面目就可能已經被李明逵嘅馬仔抬走，你話幾冇癮。
爆料熱線：29290000、27860099
報料傳真：26239278
報料電郵：[email protected]