返到律師樓，一朝早就開咗兩個會，連水都冇飲過一滴，開完會立即去Pantry飲咗一整杯。
上星期嚟咗個新嘅律師叫Dennis。佢唔算靚仔，但係個樣幾四正。唔知點解佢成日行埋嚟同我傾偈，初初講公事，𠵱家就開始問我用邊隻護膚品牌、鍾意食咩等等。佢重讚我皮膚靚！我同佢講，我由細到大都有個「飲水時間表」，令我一直樣靚又健康。
個時間表好簡單，朝早起身先飲一大杯水幫腎同肝臟解毒。返到公司再飲一杯，補充流失嘅水份。兩、三小時後再飲一杯，舒緩工作情緒。第四杯水在午餐後十五分鐘至半小時飲，強化消化機能。TeaTime可以飲一杯礦泉水，補充身體所需礦物質。放工前飲一杯水，可以在晚餐前增加飽足感，避免食過量。晚飯後再喝一杯水或者飲碗湯。每天最後一杯水應在睡前兩小時飲，以防半夜要上洗手間和第二天起身水腫。
兩日之後，發覺枱頭有份禮物，拆開嚟睇，原來係一隻杯……（二）