港股又被外圍打窒道氣，回升之勢未能持續，又再跌過，跌勢最急之時，恒指落到14734，大跌248點，係今次調整嘅新低，尾市反彈，上番14836，全日跌145點，成交197億元；9月期指收14789，低水47點。
噚日恒指幾乎去到50日線（14696），好在掉頭上番。早輪預計今次調整低位會在14700至14800之間，現時已經到埗，50日線支持能否經得起考驗，大市會否在此水平見底回升，要多觀察一段時間才能知道。今個升浪，恒指由7月初的低位13921起步，升到8月中的15509，共上升1588點，調整升幅一半，剛好係14715，呢個位應有支持。
中國人壽（2628）業績果如預期的大好，但唔派中期息，股價遂轉升（最高曾見6.30元）為跌，落到6.05元收市。國壽截至6月底止中期盈利52億元人民幣，升85%，每股盈利19仙人民幣（折18.2港仙），估計全年每股盈利36仙，PE18倍計，目標價6.50元。
經營困難應收帳惡化
第一拖拉機（038）竟然冇錢賺，重要蝕大本，令人失望。05年（12月年結）上半年，一拖營業額26.3億元（人民幣．下同），升23.2%，虧蝕3000萬元，去年同期則有盈利1050萬元。一拖04年全年盈利1196萬元，倒退27%，呆壞帳撥備4551萬元，存貨撥備745萬元。
一拖主要生產農業拖拉機同工程機械，但一個賺錢，一個蝕本。期內，農業機械營業額20.1億元，升38.7%，分類業績2784萬元，升10.5倍；工程機械營業額6.1億元，跌9.93%，分類業績虧損5844萬元。集團附屬一拖財務經營的金融業務，期內營業額2650萬元，升10%，分類業績1534萬元，升3.5%。
經營困難，應收帳亦惡化，90日以內的應收帳3.97億元，增26.5%；91至180日的有1.89億元，增112%；而半年至1年及1至2年的應收帳都增加。至於存貨就略有改善，由04年底的8.65億元減到今年6月底的7.86億元，減少9.1%。
一拖受工程機械部門拖累，下半年營運狀況難望好轉，估計全年仍係蝕本居多，暫時可以少睇一隻。
郭兆誠