林建名聽日六十八歲生日，大前晚佢喺中環麗嘉酒店擺咗十幾圍與眾同樂，到場嘉賓不乏多位八十年代電視台小生花旦，包括當年劇集《畫出彩虹》嘅男主角詹秉熙、佳視年代飾演第一代「郭靖」嘅白彪、吳岱融鍾淑慧夫婦同埋孫敬安盧敏儀夫婦等。
秋生變聾耳陳
而呢排唔多好老脾嘅黃秋生都有到場，當佢坐的士到達酒店時，見到記者即刻合埋眼，閉目打電話，記者嗌佢又唔睬，一於扮睇你唔到，一邊落車一邊煲電話粥，佢由正門入但由側門出，擺明係避傳媒，表現確實騎呢。
到凌晨十二點幾曲終人散，林建名嘅司機就由酒店搬大堆禮物上車，跟住即刻開車諗住喺其他門口接老細，點知架車一走，貓貓哋嘅林建名就由一男子攙扶下行出嚟，但佢只係望見車尾，結果一個人戙喺酒店門口俾記者任影一輪後，至等到司機返轉頭接送離開。
