即月期指上周五低水59點，明日結算，得兩個交易日，牌面睇呢兩日個市應該偏淡。不過個市通常唔會畀人輕易估中，照表面迹象做嘢有時中招多過唔中招。上周五美股軟軟哋，則可能影響今朝港股低開。有平C輪，要執番些少。
中銀C輪4760：中銀（2388）過去7日，以收市價計，最高15.95元，最低15.65元，上周收15.85元，單日升5仙，有向上破三角形之勢，有再試派成績表前16.95元機會，吼位買中銀C輪。
搏殺對象係4760，輪價70仙，睇嚟好似「大價輪」，只因隻輪係每份兌1股正股，唔係10份兌1股。如果係10份兌1股，則輪價係7仙。
隻輪10月尾到期，負溢價1%，槓桿率22.6倍。因為負溢價，唔使理有效槓桿率，大致上正股移動1毫，隻輪亦係移動1毫。
兩個月後，正股除息0.328元後，如果上番17元，隻輪值2元齊頭，有發大財機會。咪咁大貪，博正股上到16.40元，隻輪都值1.40元，翻1番。再貪少啲，博正股上到16元，隻輪都值1元，有機賺4成。
章盛