繼金屬電子交易所（8161）和中國蜂業集團（8156）話染指大陸彩票業務後，再有本地上市公司話進軍大陸彩票業務，今次係保羅．簡嘅看通集團（1059），佢以5200萬元收購一間深圳公司，喺上海同埋深圳提供無紙化彩票營運系統。
睇番走勢圖，原來看通累積升幅唔細，同去年低位0.188元比較，升咗1倍都唔止。小初覺得看通貨疏，好容易乾升。但經紀陳唔同意，佢話看通停牌前收報0.40元，往績PE只係5.8倍，而息率有4厘，已有足夠條件炒上。
況且，看通搞開資訊科技，無端端趕潮流沾手彩票業，點都似想有一番搞作。江湖傳聞有證券行度緊橋，想幫看通搞埋批股集資。
講開大陸彩票股，蜂業停牌咁耐，不利傳聞就傳足咁多日。經紀陳話，傳聞監管機構睇到實一實，公司重有好多問題要答，所以要復牌唔係一時三刻嘅事。至於在蜂林停牌批股時要咗貨嘅投資者，就真係唔知點算？經紀陳講起嚟好似有啲勞氣。
慕容小初