煲呔日前話，佢心目中有一位心儀嘅行會成員人選，不過，就冇開名，八方同一眾行家都估係馬會主席夏佳理，因為八方早前同夏主席傾過偈，發覺佢愈嚟愈同政府啱key，加上詩姐姐又話十月離開政府，咁一出一入行會，認真啱數，係人都知佢兩個當年為咗胡仙案拍枱，冇晒朋友做。
行會本來係特首嘅智囊，不過，煲呔為咗要擺平各方勢力，不得不全面接收班舊行會成員，一個不能換，好彩就冇話一個唔准加，於是佢咪喺競選時話會喺十月改組行會囉。
煲呔幾時可以改組成功，八方等着瞧，但係班前朝非官守行會成員幾大都先發制人，君不見，前行會召集人梁振英噚日開到聲，叫煲呔喺推出任何政策前，應先諮詢行會意見，特別係佢哋非官守成員嘅意見喎。
言下之意，唔知係咪振英哥已經感覺到煲呔為咗要做強政勵治，趁住行會放暑假，猛咁推出新政，忘記行會嘅存在。其實另一位行會成員周梁亦有微言，批評肥龍猛咁放政改風，話五個新增功能組別議員全部由區議員互選產生，佢一啲都唔知。
入住禮賓府有排適應
八方唔係亂咁估，因為梁振英噚日都講到明，話要求政府就政制改革問題加強諮詢行會，尋求佢哋嘅支持，梗係啦，你一方面講到一係要主流方案，一係就冇，但係傾主流方案就閂埋門同北京傾，冇振英、鈺成、耀棠、周太、美倫同埋智思份，到時你叫佢哋點幫口推銷呢，棠哥都媽媽聲啦。
嗱，老董就一定唔會咁做，所謂有鑊同孭，要振英哥出聲就唔係幾好，唔通要上演一套行會大反撲咩。
煲呔由話要搬返禮賓府住起，就已經喜上眉梢，近日佢又同記者晒命，話入住要有排適應喎，「𠵱家我喺屋企，星期日可以着件睡衣走落餐台食嘢、睇報紙，除咗對鞋，赤住腳，食完早餐返番上床，冇人話。」
將來住咗入前港督府呢？「一落樓下就要着好晒衫，着好晒鞋，梳洗得清清楚楚先可以落樓下，因為樓下已經係辦公室。」
談到九八年金融風暴應付國際炒家索羅斯，曾蔭權又同記者爆料話，索羅斯曾想約佢見面，不過佢拒絕咗，因為覺得好似唔係幾適合。
後尾索羅斯見老董，佢都係唔肯見。重話「佢哋做生意，做炒家，做對沖基金，佢係要做呢啲嘢，佢係好高技術嘅人。」曾蔭權嘅眼中，索羅斯並非好壞，反而係好成功㖭。當然佢冇講自己當年好威咁打大鱷，算係好謙㗎啦。
傳真︰2623-9278
電郵︰[email protected]