近年銀行職員連假期都要開工，永亨銀行數十名員工噚日都冇得放周日假，不過佢哋唔係拉客申請信用卡或轉樓按，而係齊齊做義工。永亨義工隊趁即將開學，到鮮魚行學校向學生大派文具用品，又同學生玩攤位遊戲，重提供免費自助餐，令學生個個都滿載而歸。
個活動叫「勵學日」，鮮魚行校長梁紀昌話，係永亨主動聯絡學校搞呢項活動。梁校長話，啲學生好多嚟自草根家庭，家長要應付開學都好手緊，而永亨向每名學生送上文具同字典，對學生好有用。
講開鮮魚行學校，佢哋反殺校「殺出名」，唔少機構同社會人士知道佢哋學生比較貧窮後，都出錢出力幫助，嚟緊周日國泰航空嘅空姐，重會到學校教學生航空知識。梁校長話，反而教統局最冇良心，學校申請專科專教、小班教學同課後輔導貧窮學生計劃都不獲批，搞到變成「三無學校」，乜都要自己籌款。
傳真︰2623-9278
電郵︰[email protected]