香港女權喺全世界嚟講都算幾高，睇吓特區政府入面有幾多女性就知啦。其中一個女將代表，自然係衞生福利及食物局常任秘書長尤曾家麗（圖），呢輪佢雖然面對好多關於食物安全嘅難題，但都從容面對，表現比好多男士更淡定。
呢位女高官，今日重會率領成三十幾人嘅代表團上北京，參加國際婦女會議，其間除咗會參與當地嘅展覽，更加會介紹婦女發展嘅成就，同埋講吓點樣促進平等權利、點樣提高女性地位咁啦。
查實今次嘅婦女會議係由國務院聯同多個團體舉辦嘅，世界好多唔同國家代表都會參加，明顯係重量級會議；尤太見慣大場面，應該唔會怯場。又咁啱上京，唔知尤太會唔會順便同啲京官接觸吓，跟進上次周局長北京之旅，請內地快快杜絕晒啲走私有毒魚呢？
傳真︰2623-9278
電郵︰[email protected]