砌機玩家當然想有部獨一無二嘅電腦，為咗照顧用家口味，組件每每都有新花臣，好似2theMAX最近推出嘅牛魔王C003機箱，外形就非常特別，版面學足晒喇叭咁款，同家居音響組合放埋一齊都相當合襯，機面三組「喇叭」雖然唔識得發聲，不過當中就附有唔同功能，好似最低一個就設有LED屏幕，可顯示CPU、顯示卡、機箱溫度同風扇轉速等資料，而整體機箱特別注重空氣流動，使用咗專利巨型導風管（CoolingAirTube）設計，可直接連接前後風扇，將熱力第一時間抽走，保持機箱涼快。另一個方便之處，係使用咗Add-on卡、DriveBay免螺絲設計，砌機時實在方便唔少！
記者：許福合
2theMAX（23053877）