【本報訊】巿民無魚食，魚販無飯開。淡水魚含孔雀石綠風波持續逾周，魚販叫苦連天，有魚販慨歎九七、金融風暴、沙士疫潮等也捱過，料不到無法逃過孔雀石綠一劫，預計今年十月一日國慶前會關門大吉，又指衞生福利及食物局局長周一嶽說話「一時一樣」，令巿民無所適從，應該辭職。
灣仔道街巿永德生猛海鮮魚販鄧先生昨表示，因長沙灣批發巿場已無貨供應，店內只售前日餘下的百多斤、約三十條淡水魚，但至昨四時多，只賣出三條鯇魚及三條大魚，故相信今仍有貨供應。他又指，由於前日批發少，平日來價每斤十二至十三元，前日已升至二十元，零售價更由每斤二十元升至二十四元。
罵曾蔭權做戲
「個檔開咗十幾年，九七無執、沙士無執、金融風暴無執，估唔到𠵱家要執。」他說，舖位租金十四萬，現時每日虧蝕三萬元，老闆已計劃結業，「預計過唔到國慶。」他直言對周一嶽非常反感，「一時一樣，令巿民無所適從，唔知應該信邊個講。」
鵝頸街巿淡水魚檔檔主陳先生慨歎生意大跌九成，即使售賣來自元朗的鯇魚，同樣生意淡薄，「聽日侷住休巿，唔休巿可以搵番啲租金，休巿就直情無飯食。」
淡水魚銷情「一池死水」，海鮮檔也同受拖累。灣仔道海鮮檔的黃女士指生意減少三成，「其實香港人有錢但係驚死，對少少嘢都好敏感，問咗唔係淡水魚都唔敢買。」她大罵曾蔭權設淡水魚宴是做戲，「佢知道班官講錯嘢，希望挽回巿民信心，但係講出嚟就收唔番口，即使你補鑊都會有條罅！」
海鮮生意微升
香港海鮮業聯合總會主席李彩華指，海鮮生意有輕微增加，但因受事件拖累，加上近期是一貫銷售低潮，「無乜話好咗好多，價錢亦唔係貴好多，可能有海鮮酒樓受影響。」
香港新界養魚協進會理事長黎來就要求政府為養魚戶提供免息貸款，他說，連日來沒有賣出淡水魚，不少養魚戶已周轉不靈，「因為買飼料係先攞咗貨後找數，呢幾日無收入，就無錢找數。」他期望政府為每戶提供五至十萬元貸款。