一班人柴娃娃去BBQ，Set好個爐之後，總有人會大叫：邊個有火機？喺呢個時候，你竟然攞個滅火筒，又或遞個青蛙頭畀佢；當阿媽準備上香時，大叫：阿仔有無火機，你又攞粒子彈出嚟。唔係玩嘢！真係火機嚟㗎。𠵱家啲火機款式好趣致，細細個可以帶出街，大大嚿嘅可以放響屋企做擺設㖭！
記者︰劉昱蘭
攝影︰陳陶鈞
Model︰Bonny
SuperSize做埋擺設
煙灰缸彈身
呢粒子彈足足有9吋高，打開彈頭就會見到個火口位，拎走個打火機後彈殼位變成煙灰缸，真係唔止打火機咁簡單。
售價︰$168（b）
迷你油桶
4吋高嘅油桶屬迷你版，但4吋高嘅火機就一啲都唔細，油桶火機設計同巨型子彈大同小異，都係由三個部份組成，蓋、火機、煙灰缸。
售價︰$68（b）
微型原子彈
6吋高原子彈，打開個子彈頭，就可以見到個火口位，但火機下面就無連埋煙灰缸。
售價︰$168（b）
玩嘢外形似玩具
着火垃圾桶
撻着咗之後，好似垃圾桶上面個煙灰缸着咗火咁，咁都諗到，好嘢！
售價︰$28（a）
寬容青蛙
青蛙笑笑口，想佢畀火你嘅時候，就要襟佢隻眼，佢會喺兩隻眼中間噴火。青蛙個樣實在太Cutie，小心細路仔攞咗嚟當玩具玩。
售價︰$98（b）
火燒人字拖
將人字拖夾腳趾個位向下推，鋁身鞋底嘅鞋頭位會噴火。拖鞋形嘅打火機咁特別，都幾難可以同人撞款。
售價︰$39（c）
噴火定滅火？
將滅火筒手柄同頂部黑色嘅撻火掣一夾，滅火筒都可以噴火。手柄同撻火掣中間有個黑色膠粒頂住，要拎走個安全掣先可以用。
售價︰$28（a）
微型便當
外形同玩具店嘅微型食物玩具差唔多，令人覺得似玩具多啲。將上層的食物盤輕輕一推，就會撻着下層的火口位。小心下層的兩端都有窿，一個係火口，另一個係入Gas同埋調校大細火的窿，千祈唔好搞錯整親手。
售價︰$98（b）
鼻孔出火
呢兩隻動物梗係前世不被人類善待，一隻前世係燒豬，一隻啲牛奶俾人揸乾揸盡，今世投胎要雙孔噴怒火，燒番夠本，乜仇都報晒。
乳牛火機
售價︰$68（b）
豬仔火機
售價︰$38（a）
功能至上實用型
遠足露營唔少得
右邊銀色突出的部份就係撻火掣，機身上嘅大圓形位係溫度計，細圓形係指南針，另外有英文字嗰邊係個爬山扣，呢個打火機，啱晒鍾意遠足露營的運動發燒友。
售價︰$69（c）
開瓶器×打火機
將開瓶器、打火機Crossover真係前所未見，但要反轉個開瓶器先會見到個火口位，所以唔好妄想可以試吓一邊開嘢飲，一邊點火。
售價︰$59（c）
直噴式最啱點蠟燭
如將一般打火機水平平放，個火會向上燒，好易燒親手。但呢個打火機就算將佢倒轉先撻着佢，個火都會向下直射出去。如果蠟燭已放入玻璃瓶入面，就毋須拎出嚟都可以點得着。
售價︰$98（b）
男孩特區
火箭機尾噴火
火箭發射時機尾會噴火，所以呢個打火機個火口位都喺底部。而扭開火箭個頭，就係入Gas同埋調校大細火的位置。
售價︰$78（b）
走火槍
一按扳手，槍嘴兩個窿都會出火。槍筒有6吋長，撻火時一定唔怕燒到手，夠晒安全。
售價︰$38（a）
最惹火
膠製嘅比堅尼索女外殼，男士最愛，機身係防火膠料唔會溶，用嘅時候揸住佢條小蠻腰，手感一流。呢個火機無入Gas或調校大細火的功能。
售價︰$48（b）
防風太空船
呢隻太空船要打開船頭先見到個撻火掣，船頭打開咗可以擋到啲啲風。
售價︰$78（b）
售賣點
（a）HAMS.JBCo.
銅鑼灣地帶261舖
（25041238）
（b）kimihe
尖沙嘴加連威老道54B舖
（23121008）
（c）Purple'sCo.
銅鑼灣地帶156舖
（35800043）