煮煮吓飯，表妹Sabrina打電話嚟，係咁講公司啲是非。佢話呢排秘書小姐頻頻收花，同老細嘅眼神接觸又好似有啲嘢咁，睇怕不久就會有一場腥風血雨……有冇咁誇呀？
我Josephine係中環某大律師行嘅OL，秘書追律師呢啲場面簡直見慣不怪。好似今日秘書Pinky條裙咁，短到不可再短，重要特登踎低搵File，唔使問，啲律師梗係睇到眼甘甘啦。
真係多得呢啲秘書唔少，啲律師哥兒十成十因為咁冇心機做嘢，掟晒啲濕碎嘢畀我做，搞到我八點幾先收工。食完飯都成十點喇，雖然好累，但係唔想咁早瞓，怕變肥豬冇人要。以前我都會以為呢啲時候落街散步可以促進消化，但後來先知道係一個冇科學根據嘅謬誤。因為飯後體內消化器官不斷運作，以助盡快消化食物。如果飯後立即去散步或者進行其他運動，所運用嘅肌肉就會同消化器官爭奪血液供應量，阻礙消化器官運作，令到消化受影響。長久落去，重會出現消化系統毛病㖭呀！（一）