煲碟王：盜獵藏羚羊藏民絕地死鬥

有影評人話，拍攝一輯紀錄片，往往要花十年八載時間，才告完成；但係睇一齣紀錄片，就只需要一、兩個鐘時間就夠！除咗證明紀錄片內容夠精練，其實大家所吸收嘅電影「養份」，隨時重厚過一本書！《可可西里》特別之處，係表面上僅用咗四個月拍攝，但內容卻恍如紀錄片般真實，等你唔使登上海拔5,000米嘅高原，一樣了解到可可西里呢個地方！

記者：陳國輝

Profile

片名：《可可西里》
發行：年代
導演：陸川
主演：多布杰、張磊、元亮、馬占林、趙雪瑩
片長：90分鐘

青藏高原實地拍攝

可可西里──藏語入面，意思係「美麗的少女」咁解。故事講述呢一片屬於青藏高原嘅動物保育區，突然受到一班盜獵者進行藏羚羊血腥大屠殺！喺幾年間，藏羚羊數目由一百萬銳減至一萬隻都唔夠！喺93年，由藏民組織而成嘅武裝巡山隊，開始以打擊盜獵者為目標；可悲嘅係，苦苦鬥爭下，唔單止愈嚟愈多人犧性；同時，亦愈嚟愈多人透過販賣藏羚羊皮毛而變得富有。

■為保護當地藏羚羊，藏族與漢族於93年成立一支武裝巡山隊伍，專門追擊盜獵分子。

■盜獵者可謂殺「羊」如麻！幾年之間，就將藏羚羊嘅數目由一百萬隻殺剩不足一萬隻。

■可惜DVD版並冇收錄Bonus內容，例如拍攝花絮，導演專訪等，只能夠齋睇電影。

寫實苦況逐一追擊

國內攝製隊遠赴青藏高原之一—可可西里，除咗拍攝90年代巡山隊員點樣追擊盜獵分子之外，又將當地嘅特殊天氣及地理環境，以細緻、寫實嘅手法演繹，就算大家未去過，甚至未聽過可可西里，但係睇咗之後，都會有明確了解。最大難題必屬高山氣候，可可西里平均海拔5,000米，莫講普通人，就算藏族人，只要唔停咁跑，過一陣就會患上「高山綜合症」，因腦水腫或肺水腫致死；至於高原「陷阱」，例如浮沙、突然狂風暴雪等，劇情裏面亦有交足功課。

■可可西里沙石處處，平地亦好罕見，所以大部份以吉普車代步！

■男主角係北京報社派嚟嘅記者，目的係追訪一宗巡山隊員被殺案。

■可可西里遍野沙漠，隨時都會好似呢位仁兄咁，不幸跌落浮沙就玩完。

信仰生存只擇其一

有人因為信仰，獲得精采嘅生命；亦有人因為信仰呢兩個字，搞到日日冇飯開，重要賠上性命！《可》片入面講緊嘅藏族佛教，就係後者。藏人深信，保護自然同生命，係每個人嘅責任，佢哋唔容許有殺生行為，何況係面臨絕種嘅藏羚羊？不過，喺拯救生命嘅同時，亦傷害緊自己；藏人組成嘅巡山隊為追擊盜獵者，不惜喺缺糧、暴雪環境下，仍繼續追捕，結果8名巡山隊員，每個人嘅下場都非常悲慘。唔通要咁犧牲先叫做轟烈？

■藏羚羊被槍殺後，毛皮會被剝，運往歐美國家賣錢。

■團結就是力量，當汽車死火嗰陣，就要十幾人一齊合力拉車！

■兩名首腦終於碰面，一個為信仰誓死保護家園；一個為生存而濫殺羊群，究竟係邊個嘅錯？

■為搵大錢，盜獵者不惜濫殺當地受保護嘅藏羚羊！

天葬儀式睇足全程

藏族好重視人死後嘅儀式，大家聽得最多嘅「天葬」，即源於西藏！《可》片裏面，開頭同結尾均出現過「天葬」片段，而且儀式程序部份，例如藏憎替死者念經、禿鷹啄食屍肉等場面，都描述得頗為細緻。不過，取出內臟、削肉剝皮等令人睇完惡心嘅畫面，劇情入面就冇刻意交代，只係輕輕帶過就算！「天葬」相比起香港傳統嘅火葬儀式，程序明顯繁複得多；或者可以解釋，除咗文化差異之外，藏族人對信仰嗰種堅定不移嘅精神，亦係該片最值得大家一睇嘅原因。

■西藏人食兔肉，人人都慣晒血淋淋生食，問你敢唔敢試？

■葬禮儀式結尾，就係將屍首斬成一塊塊，然後拎去餵禿鷹。

■舉行天葬儀式，會一邊奏樂，用利刃將屍體從背部剖開，取出內臟切碎。

■按藏族天葬風俗，葬禮儀式會由藏僧主持，過程係首先替死者包上一塊白布。