有長實「樓神」之稱嘅長實執行董事趙國雄，噚日接受電台訪問，大談佢個人嘅入行故事。樓神話，七八年喺加拿大返嚟，就入咗恒隆集團嘅石油氣部門，間中重托吓石油氣㖭！之後受到賞識而調往地產部，一做就做咗十五年，後嚟覺得恒隆太保守，就喺九六年跳槽咗去信和置業。
樓神解釋，佢當年揀信置，就係睇好佢哋夠進取，特別係素有地產大好友之稱嘅信置主席黃至祥。佢重大讚黃老闆對下屬要求合理，眼光亦好準，同埋唔會搵拍檔笨咁話喎。不過，最唔好嘅係佢鍾意鬧人。樓神話，俾黃老闆鬧咗三年終於頂唔住，諗住跳槽去李超人嘅長實。
樓神首先搵長實前營業部執行董事洪小蓮，之後由洪小蓮將佢引薦畀超人。超人一坐低，劈頭第一句同佢講，我哋呢度唔呃人嘅，所以誠信係非常重要。樓神話，當年超人所講嘅嘢，佢到今時今日仍然放喺心中。佢重同八方講，做任何事都要勤力，一定會有人賞識嘅！
爆料熱線：29290000、27860099
報料傳真：26239278
報料電郵：[email protected]