本報兩日前曾經報道鍾麗緹唔肯認老公阿Jon，當日記者因為收到風話佢哋感情出現問題，所以先打電話向鍾麗緹求證，記者重先後兩次同佢通話，都係想搞清楚實情，當時記者同鍾麗緹講，只要佢否認，又或者講一句「同老公關係重好好」，就唔會寫有關婚變嘅事，但佢話「我唔會講，我哋兩個人嘅事唔關其他人事」，佢好有耐性咁同記者傾偈，但對於感情問題始終支吾以對，重叫老公做「我朋友」，而佢老公對於感情有變嘅問題又話「唔識點答」，於是記者將聽到嘅傳聞同佢哋所講嘅嘢照實寫出嚟，亦向鍾麗緹講明會寫。
藝人多面睇
點知轉頭鍾麗緹就去同第二份報紙話記者作嘢，馮仁昭當然唔排除記者入面有害群之馬啦，但有啲藝人為做新聞博見報，講完嘢又唔肯認，或者特登誤導記者，為自己好耐冇蒲頭造吓勢，第二日可以出嚟否認見多次報，反正一句記者作嘢就搞掂。馮仁昭今次講呢件事出嚟，畀大家知道吓有啲藝人嘅真面目係點，馮仁昭亦唔介意俾佢利用，咪等佢見多次報咯。