高人請飲下午茶，問左丁山飲乜嘢，順口答句：EarlGrey。點知工人細細聲喺左丁山耳邊講：「好對唔住，我哋冇EarlGrey，飲普洱得唔得？」梗係得啦，冇研究之至。左丁山好學唔學，掹陶傑衫尾學咗唯一嘅英式習慣，就係飲EarlGrey。高人不好此道，家中不備此茶，但有靚普洱。諗諗吓，左丁山賺錢冇人咁多，成就冇人咁高，都係沉醉於小資產階級生活之過。
高人快人快語，前後一貫，有果斷之風，相信佢嘅對手想攞佢便宜，難乎其難。佢求才若渴，問左丁山有冇一流人才可以介紹，呢啲人必須年青有為（四十五歲左右），在行內享有聲譽，人人聞其名而稱讚，可以服眾者。左丁山諗到幾個，想話提出嚟，但回心再諗，弊，位位六十幾歲，唔啱聽喎，於是收聲唔講。香港好似有啲人才斷層，仍領風騷者，都曾在社會成名二十年或以上，如果重繼續搵佢哋，以後如何培養接班人？真頭痛，諗唔通，留番畀ＩＱ過人之高人去諗可也。
亞洲地區，慣咗老人掛帥，六十歲只係啱啱開始，仍然大有前途，歐美個別國家就唔同，四十幾、五十幾歲都可以坐第一把交椅，好似克林頓、貝理雅、布殊，仍然未夠六十歲。德國就快競選，好有希望成為德國第一位女總理嘅AngelaMerkel五十一歲，聲言帶領基督教民主黨上台後就會進行大改革，搵咗一位前法官做經濟顧問，呢位顧問話佢上台之後，就會採用香港式嘅flattax，將德國稅率定為25%，取消一切稅務優惠，喺德國嚟講，直情係革命性。
呢位Angela每次出場造勢，基民黨就會播出滾石樂隊一九七三年流行曲《Angie》，引起滾石樂隊抗議。一位來自前東柏林之物理學博士，離婚無子之女基督徒，可以成為基民黨領導人甚至德國總理，真能人也。