華晨中國（1114）由04年挨近5蚊邊，插到今年頭，跌足7成，拒絕再跌，取而代之打橫行，當炒上落，有得諗。
華晨最近見名牌鄧普頓增持，前星期四（18日）為止，鄧普頓揸咗華晨2.24億股（6.1%）。鄧普頓出名係價值投資兼人棄我取，創辦人鄧普頓同樣喺七八十年代，美國汽車業飽受油價急飆、日本廉價汽車衝擊之時，買入當時蝕緊錢嘅福特，結果點？鄧生賺咗9倍，贏大大鑊。情況同家陣祖國汽車股，受油價飆升、原料價漲及祖國宏調，數得出多籮籮利淡形勢，一模一樣。
再講，鄧生當年鍾情福特呢個品牌，今時今日，華晨同寶馬合營，BMW亦係名牌，汽車業一復甦，名牌有着數。又華晨到去年底手頭現金50億銀，就算扣埋一筆16億銀嘅CB，淨現金講緊近33億銀，現價67%係淨現金。散戶無基金咁有耐性，但華晨有資產質素墊底，以最近兩個月高低位1.26元至1.5元炒上落，問題唔大。
寰宇有買盤密吸
寰宇（1046）靜咗好耐，上星期開始有買盤密吸，呢隻股值得收集，又講兩點：第一，寰宇NAV0.173元，現價（4.5仙）折讓74%，又手頭淨現金6300萬銀，每股淨現金值3.8仙，同現價差無幾。第二，呢期寰宇開拍電視劇，年頭報章資料話，寰宇一集成本70萬銀，售價50萬銀，一套電視劇30集，計計數，一套劇成本2100萬銀，售價1500萬銀。賣俾一個電視台就話冇料到，好似《功夫足球》咁，一劇多售，淨計中、港、台三地版權費，寰宇賺凸。寰宇嚟緊日子，重有《伙頭智多星》及《昭君出塞》兩套電視劇，肥仔水。
錢雋