有C輪發行嘅國指重磅成份股，昨日最標青嘅有中國財險（2328）、中鋁（2600）與國壽（2628）。10大升幅窩輪榜，着咗7隻係佢哋嘅C輪。
中國財險C輪：中國財險升9%，C輪4754升7仙，由8.6仙飛上15.4仙，升幅79%，唔係乾煎，有86球易手，金額1182萬元。冇錯，隻輪1份兌1股，正股升20仙，隻輪按對沖值（33%）計，升7仙左右啱數。不過睇吓基本數據，明年3月夠鐘，14倍槓桿率都唔錯，但實際槓桿率得4.5倍，引伸波幅又去到54%。溢價呢？高達41.1%。咁嘅輪，你買埋我份。其他財險C輪9461明年8月夠鐘，槓桿率5.7倍，溢價又係42.3%，好少成交，又係你買埋我份。如果認為財險重有得去，直接買正股，無謂搞啲C輪。
中鋁C輪：中鋁升3%，C輪3881由2.5仙飛上5.9仙，升幅136%，成交金額唔夠10萬銀。下月尾夠鐘，溢價11%，風險好大。
中鋁C輪10月打後嗰批，溢價普遍好大。9月尾到期嘅3805，輪價41仙，溢價2.6%，槓桿率10.5倍（有效7.7倍），引伸波幅43%，相對上比較可取。
國壽C輪：國壽升2.5%，C輪3847升60%。隻輪溢價低，未來波幅仍大。
如果繼續睇好國壽，揀輪炒，又唔想博得太盡（贏輸都冇咁勁），揀4702，明年1月中到期，輪價54仙，溢價7.1%，槓桿率11.5倍（有效6.9倍），引伸波幅29%。
章盛