港股噚日在長和系帶動下上升93點至14982，成交192.56億元。長實（001）午後發力抽上，升3.2%至83.80元，和黃（013）亦升0.78%至77.70元。
市場一般覺得和黃3G前景開始明朗，不明朗因素漸消除，而長實的地產業務看漲。其實兩股的中期業績屬市場預期，點解長實走勢咁強勁？原來市場再傳超人入市增持，至於被和黃霍大班話分析員報告唔合格嘅花旗，則維持長和系沽售的評級。
除長實外，地產股噚日明顯造好，其中新世界（017）與信置（083）分別升4.25%及2.32%，恒地（012）及新地（016）亦升0.92%及0.89%。下月港府一口氣拍賣3幅地皮，而地皮規模唔細，相信地產發展商會爭得好激烈，有資金吸定地產股亦唔奇。
市傳快將正式引入微軟做股東的浪潮國際（8141），噚日晨早玩停牌，待發出股價敏感資料。據聞浪潮在周四股價大起大落之際，有唔少投機者接咗貨，亦有大戶趁機出貨。下周復牌後會點玩，真係好難講，但此股有證監盯住，炒家未必太放肆。
南航（1055）中期營業額勁升61%至178.44億元人民幣，但就勁蝕10億元人民幣，相信與油價勁升有關，現時油價比上半年還要高，南航下半年相信難以扭轉劣勢。從圖表看來，股價若跌穿2元，要到1.50元水平才有強大支持。東航（670）股價亦可能受到拖累。
卓悅進軍濠江
卓悅（653）下周將公布進軍濠江零售業務大計，而且重拍住奧瑪仕（959）旗下間希臘神話一齊玩，睇嚟卓悅想借濠江概念扭轉股價弱勢。
阿虎