「十姑娘」何婉琪同佢阿哥、賭王何鴻燊之間嘅糾紛，將證監會捲埋入內。事緣十姑娘質疑賭王主持嘅信德集團出現問題交易，舊年底向證監會投訴，但證監以事件涉及私人公司的商業糾紛，唔屬於佢管轄範圍，所以拒絕受理。本來十姑娘今年三月曾經入稟高院，提出司法覆核，認為事件應屬證監職權，當時證監即時轉軚，話會重新考慮嗰宗投訴，十姑娘於是撤回訴訟。
點知五月證監回信畀十姑娘，都係講番事件並非佢哋管轄，拒絕受理。今次十姑娘再次入稟，要求高院准許司法覆核。早兩個月賭王控制嘅澳門旅遊娛樂公司，已經將十姑娘「叮出局」，被除去股東名份，兄妹兩人關係已經白熱化，睇吓除咗入稟之外，十姑娘又會如何出招。
傳真︰2623-9278
電郵︰[email protected]