譚詠麟前晚在演唱會上，與嘉賓劉德華除爭認後生靚仔外，還大講兒女經，華仔表示生兒育女壓力甚大，又謂深深體會到為人父的慘況。
譚詠麟前晚在紅館舉行首場《譚詠麟歌者戀歌濃情三十年演唱會》，請來劉德華及黃伊汶任嘉賓。華仔出場時，全場反應熱烈，他與阿倫合唱《無間道》及《夏日寒風》，之後又獨唱《再說一次我愛你》。
組狗乸樂隊
阿倫與華仔除唱歌外，還在台上互窒，阿倫說：「記得十八年前，你都喺呢個舞台做我嘉賓。」華仔說：「嗰陣啲觀眾對眼只係望住你，冇人望我，可能我唔夠你靚仔呀。」阿倫即表示：「你𠵱家靚仔過我咩？」華仔笑謂：「我二十五歲過你囉。」
後來阿倫稱讚華仔在新戲《童夢奇緣》中的小朋友及老妝扮相十分出色，當阿倫得悉小朋友真有其人時，他即說：「好似你喎，有眼有耳有鼻，莫非……。」華仔馬上表示：「我鄭重同呢度一萬二千人講，我冇仔冇女冇結婚，如果我有仔一定會帶畀大家睇，我見到阿倫都唔敢生ＢＢ住，壓力好大。」
阿倫笑說：「你又體會到？」華仔即表示是從朋友處感受得到，阿倫欲言又止道：「係啦，我本來有嘢講，𠵱家冇啦。」
華仔後來問若溫拿開演唱會他可否加入其中，阿倫即謂：「咁要叫豬乸或者狗乸。」
華仔回應說：「後面嗰個好聽啲。」阿倫又重提華仔以往走埠時唱他的歌，常因忘記歌詞，而只唱啦啦啦了事，華仔說：「我師承譚詠麟㗎。」阿倫即反駁說：「真係厚顏無恥，重叫首歌做lalasong。」
歌聲悼故人
而當阿倫獻唱《火美人》時，黃伊汶以性感森巴女郎造型出場，與幾位男舞蹈員大跳火辣舞，又和阿倫對跳，不過其鑲石服裝卻不慎勾到阿倫的衣服。
而阿倫還特設一環節向他的已故朋友致敬，他說：「我喺圈中幾十年，見盡娛樂圈高低起跌，有幾個朋友離開咗，我內心好懷念佢哋，希望大家畀掌聲回報過咗身嘅呢班朋友。」
阿倫遂說出黃霑、林振強、鄧麗君、陳百強、黃家駒、羅文、張國榮及梅艷芳的名字。阿倫又謂要珍惜過去及現在的人和事，他說：「我冇乜要求，好簡單，只係要一份愛。」歌迷聞言竟大叫生仔生女抱孫及娶老婆，十分搞笑。阿倫臨完場時，宣布將於九月四日加開一場，當日邀得徐小鳳任嘉賓。
採訪：王連連 攝影：仇志德
