話口未完，浪潮國際（8141）昨日就停牌，江湖自然係傳美國微軟落實認購可換股債券。有大陸同胞話，換股價相對停牌前收市價有大折讓，但經紀陳覺得，話晒微軟個名夠勁，所以定價相宜多少都值得。
浪潮上市咁耐，公眾對呢間公司所知甚少，所以隻股炒咗咁耐，似乎都唔係好關本地股民事，好可能係大陸同胞的私人派對。
另外，中國環保電力（290）昨日下午亦停牌，話會就一項非常重大收購交易發表通告。與此同時，名稱差唔多，而董事會背景又有多少相近的中科環保（351），股價下跌5.13％，收0.74元，究竟兩者有冇關連呢？
經紀陳話，中科環保先排傳通街，話同中國電力（2380）初步斟緊入股，吸引唔少炒家追捧，但等咗一排都未見有動靜。
今次同中科環保關係密切嘅中國環保電力停牌，市場即刻傳出可能係大家捉錯用神，分分鐘停牌嗰隻先至係正印，所以中科環保股價即刻受到影響。
慕容小初