每年暑假立法會休會，就係議員、官員放暑假嘅時候，不過今年暑假特別短，因為內地毒魚事件，搞到立法會連續兩個禮拜開特別會議，唔知係咪holidaymood未過，議員開會似乎不在狀態，工聯會王國興噚日搶先提問，但一開口就出事，質問周一嶽局長幾時成立食品安全中心，又問局長點處理「走私魚」問題，在座人士一聽到即時呆晒，事關呢兩個問題上星期已傾咗，王國興𠵱家先問，連周一嶽都窒佢「王議員可能放假放得太開心」。
王國興個心未放完假，自由黨方剛重經典，質疑政府喺防止毒魚入港方面無能，市民食唔食魚惟政府「馬首是瞻」。呢句說話一出真係攞膽，方議員咁都講得出，業界又點能夠惟你「馬首是瞻」呢？會上另一爆笑位係嫻姐怒批官員辦事不力，狂數𠵱家市民雞、豬、魚、羊唔食得，主席李華明即時糾正「羊未有事喎。」嫻姐話「遲早有事嘅。」嫻姐你真係唔好隨便講嘢喎。
傳真︰2623-9278
電郵︰[email protected]