【陳月媚、蔡如玉報道】七歲男童岑浩賢被兩名神秘刀手向他的右手和右腿揮刀狂斬六刀一事，惹起香港巿民的公憤，娛樂圈藝人對事件震怒之餘，亦紛紛向男童伸出援手，捐錢給《蘋果日報岑浩賢援助基金》作為男童日後的醫療和教育費用，其中周潤發捐出十萬，黎明、陳慧琳和楊千嬅各捐出五萬。
周潤發：替個細路心痛
周潤發對於男童被斬的事件表示心痛，他昨日在電話中說：「發生件咁嘅事真係好唔公平，我好替個細路仔心痛，咁細個就要經歷咁大嘅傷痛，我唔清楚發生緊乜事，亦唔知佢屋企背景係點，但細路仔係無知嘅，我純粹覺得個細路仔日後嘅醫療同教育都好需要金錢，而盡一點綿力，希望大家亦幫吓個細路，但捐出嚟嘅錢，就需要運用同監管得好啲。」
身為聯合會兒童基金會大使的黎明，對事件表示憤怒，黎明在電話中說：「細路仔係無辜嘅，兒童應該得到保護，我強烈呼籲警方盡快緝兇，個細路仔好慘，我捐五萬係希望喺醫療同教育上面幫一幫佢，如果佢將來傷勢情況需要出國醫治嘅話，我會再喺其他方面協助佢。」
曾獲選世界傑青的陳慧琳昨日在電話中表示得悉此事時感到毛骨悚然，她說：「呢位小朋友嘅成長過程本來可能都己經係唔愉快，𠵱家重遇到咁大嘅苦況，心靈一定受到好大傷害，對佢將來嘅成長會造成陰影，希望多啲熱心人士可以畀多啲關懷佢。啲錢希望可以幫到佢解決嚟緊會遇到嘅問題，醫藥或者生活費咁，亦都希望警方快啲捉到兇徒。」
在澳洲公幹的楊千嬅昨日透過香港的助手得悉事件，她在電話中說：「個小朋友𠵱家咁嘅環境，兇徒點可以咁狠，真係令人齒冷，希望警方快啲破案，同埋最緊要幫小朋友做心理輔導工作。」
同是世青的劉德華昨早飛到西安舉行內地巡迴演唱會，他在飛機上閱報得悉此事，感到十分氣憤，華仔在電話中說：「一個七歲嘅細路仔可以得罪人啲乜嘢？竟然會受到咁嘅對待。一人做事一人當，小朋友係無辜嘅，」
劉德華：市民幫手緝兇
華仔呼籲全港市民幫手緝兇，有任何線索都應盡快與警方聯絡，華仔說：「我相信警方會盡力而且係有能力捉到啲兇徒，同時我哋都應該關心小朋友嘅健康，喺醫療上幫佢。」華仔表示待了解清楚小朋友在醫療上或日後生活上的需要後，會透過劉德華慈善基金施以援手。
