今個月NDS都算多大作，繼月頭推出咗熱鬧嘅打鬥遊戲《JUMPSUPERSTARS》之外，月尾又出多隻好多人都期待嘅動作遊戲《惡魔城DRACULA－蒼月的十字架》，延續GBA上面《惡魔城－月下之夜想曲》嘅故事，再加上發揮NDS獨有嘅TouchScreen功能嚟出招，睇嚟各位NDS玩家呢個月打機都會打到好鬼忙！
記者：梁瑋瑜
《惡魔城》呢個系列，大大話話都出過好多部作品，其受歡迎程度大家都唔需要懷疑，今次喺NDS上面出現，活用雙螢幕令遊戲畫面更加豐富，而且NDS嘅音效比起GBA亦都高幾班，呢部《惡魔城DRACULA－蒼月的十字架》真係不容錯過！
德古拉轉世反擊戰
故事主角係一個表面上平平無奇嘅日本高校生來須蒼真，其實佢真正嘅身份係吸血鬼之王德古拉嘅轉世，喺上集《月下之夜想曲》裏面講到來須蒼真戰勝咗身為吸血鬼轉世嘅命運，唔再墮入黑暗嘅輪迴裏面，可惜好景不常，到咗2036年，邪教加魯度教團出現，教祖茜莉亞為咗令魔王復活，千方百計要殺害來須蒼真，蒼真唔想再受騷擾，決定主動出擊，直搗黃龍，先去消滅呢個集團。過程中蒼真青梅竹馬嘅好朋友白馬彌那，同埋政府機密組織派嚟負責監視蒼真一舉一動嘅有角幻也都會出現，佢哋同埋蒼真當然會有一啲交流場面啦，都幾有RPGFeel㗎！
NDS獨有手畫封印
以往嘅惡魔城以PS2同埋GBA作為平台，限制於單畫面，今次NDS有雙畫面，下面嘅螢幕顯示故事進展，打惡魔執寶等等全部都喺呢度進行，而上面嘅畫面就用咗嚟顯示地圖，或者係主角嘅能力狀況咁，唔需要好似以前咁，要切換畫面咁唔方便，呢一方面惟NDS獨有！此外，每次打低大佬之後玩家需要利用輕觸筆畫出「魔法封印」，成功之後先可以將大佬完全消滅，否則大佬會再次回復少許HP，玩家又要再打過！呢個玩法似足《狐忍RPG2》，雖然有少少夾硬咁用呢個TouchScreen功能，不過都算係加入咗其他平台之外嘅新元素，唔實用都叫做有驚喜啦！
用「魂」合成武器
《惡魔城DRACULA－蒼月的十字架》係一個2D嘅橫軸動作遊戲，當中除咗一般攻擊之外，重有好多特別元素，例如當打倒不同的魔物，就會得到唔同嘅「魂」，去到裝備畫面Enchat呢啲「魂」，主角就可以發揮唔同嘅法術；當然，用呢啲法術嘅時候，還需要有足夠嘅MP配合啦！擁有愈多「魂」，法術嘅攻擊力就會愈強。
另外，玩家又可以用呢啲「魂」進行武器合成，將手上嘅CheapCheap武器升級，用埋幾個超級大佬嘅「魂」，合成出嚟嘅武器就梗係愈強啦！好多網友都話呢個遊戲嘅大佬好難打，玩家真係要熟習使用各種魔法，先至可以過關，好有挑戰性㗎！
Profile
機種：NDS
類型：動作
推出日期：8月25日
售價：$310
DreamStore
（25753285）
地址：灣仔東方188商場2樓256號舖