迪士尼日日試業，大量招呼相關同友好人士去試玩，任你挑剔，不愧係美國大公司，絕冇小器。試業期間，雖然偶有不利消息，但係大部份都係好嘢。有位老朋友就笑說，香港迪士尼開幕，慳咗唔少廣告費，皆因電視台、雜誌、報紙都好樂意同佢做免費宣傳，全部都唔使錢，令佢佔晒上風成晒勢。
迪士尼好有人情味
除咗佢哋公關好嘢，迪士尼都好有人情味，上個星期六，佢哋就特別招呼已經落咗台嘅前特首董建華一家大細入去玩；老董同人講，話九個孫都唔知玩得幾開心，實在一大樂事喎。
老董在位七年幾，最偉大嘅構思，可能就係引入迪士尼樂園，可惜只差半年，佢都無法以特首身份為個樂園揭幕，真係時也命也。記得三月份證實佢下台之日，消息喺夜晚出街，而當日下晝，阿董仍在接見迪士尼高層，新聞處重發咗佢哋會面張相，翌日報紙報道特首唔玩嘅消息，都係用呢張相，相信迪士尼總裁見到都好詫異。
今日人人講迪士尼效應，點有利旅遊業有利酒店、有利零售，以至刺激經濟，製造就業機會，總之就乜都利好，可惜阿董生冇法子守到雲開就已經腳痛，種咗七年棵樹留畀煲呔乘涼；今勻迪士尼請佢老人家去玩，都好有心。
傳真︰2623-9278
電郵︰[email protected]