阿Mid愛貓成狂，為可以日對夜對貓仔，毅然從玩具設計轉投首飾設計，首飾多是趣致貓造型，正宗寓工作於娛樂。今日，他滿心歡喜地抱着剛領養回來的暹邏貓旺旺回母親家，一心介紹畀3隻寶貝波斯貓阿寶一家認識，誰知阿寶毫不領情，死不合照……
記者：鄺天樂
攝影：周旭文
外敵入侵篇
暹邏貓入侵
唉！為乜要搞到家無寧日？波斯貓阿寶一家本來住得安安樂樂，竟然有貓斗膽入侵，來者何貓？原來是阿Mid從相熟茶餐廳領養回來的暹邏貓：「間茶餐廳執笠，隻貓仔叫旺旺，朝朝陪我食早餐，好唔捨得，所以我帶佢返屋企。」採訪當日阿Mid帶旺旺回家拍照，途中全程乖乖無曳曳，點知一步入家門就發出「嗚～嗚～嗚！」撩交打的聲音，原來旺旺一直住在阿Mid家中，而波斯三寶則與阿Mid父母同住，阿寶一家見有外敵入侵，立即雞飛狗走，各自閃開如臨大敵。一心想四隻愛貓和平共處影靚相，怎料一屋不能藏二貓（不同種），雙方一聞到有異味立即進入戒備狀態，阿寶一家絕不好客，左閃右避死不合照，苦了我們的攝影師哥哥跟牠們通屋閃足大半個鐘！
貓仔Profile
轉工為波斯貓家族
引貓入室，本來就因為愛貓。家陣貓兒爭風呷醋根本是小事，能令阿Mid神魂顛倒的波斯貓夫婦阿寶、阿白與囡囡阿黃一家三口，更使阿Mid連份工都唔要：「我本來係玩具設計師，工作幾辛苦都好，返屋企只要一見到可愛貓仔，成個人就輕鬆起嚟，我成日諗，如果可以帶啲貓返Office日對夜對就VeryGood喇。」辦公室當然不能養寵物，所以他退而求其次，轉行不當玩具設計師，搖身一變成為以貓貓為主題的首飾設計師。「可以寓工作於娛樂囉，阿寶一家三口一舉手一投足，都係我創作靈感泉源。爸爸阿寶與媽咪阿白都是純種波斯貓，生咗一大竇白雪雪的貓BB，係得貓女阿黃嘅毛色啡中帶黃色。」由於與別不同，眾多兄弟姐妹中，阿Mid就獨把阿黃留下，其他的統統送給朋友。
為食家族歎慣海鮮
阿寶一家三口出名為食，阿Mid大歎：「呢啲咪唔好大教壞細囉。」何出此言？因爸爸阿寶與囡囡阿黃有同一壞習慣，無時無刻喵喵聲扮嗲討吃，而且非常嘴刁，貓糧？牠們嗤之以貓鼻，兩父女只吃蝦蟹海鮮，相比下媽咪阿白無咁嘴刁，肯吃貓糧，阿Mid又歎：「平時阿寶重會吞埋阿白嗰份，所以一家三口要分開開餐！」解決了爭食問題，家陣又要調停爭寵風波，阿Mid又要諗計喇！
設計靈感來自小貓
