香港嘅唱片公司以往都係各顧各，好少互相合作，不過𠵱家唱片巿道唔好，所以佢哋都開始肯團結，好似由華納唱片發行《森美小儀歌劇團亞卡比槍擊事件愛情萬歲》嘅同名大碟咁，就集合咗鄭伊健、薛凱琪（Fiona）、黃貫中、Kary（吳家穎）、應昌佑同埋森美、小儀嘅新歌，都算係一個創舉。
殺出新血路
呢個劇團之前搞咗六年，向來都係用同一間唱片公司嘅歌手去做，都係為免出碟麻煩，今年佢哋個個嚟自唔同嘅唱片公司，鄭伊健係BMA、薛凱琪係華納、應昌佑係東亞、Kary係金牌，四間唔同嘅唱片公司破天荒攜手一齊推出唱片，九月初重會推出VCD，啲唱片公司唔再好似以前咁乜都要獨攬，有咁嘅轉變，馮仁昭覺得絕對係好現象，同行唔一定係敵國嘅，大家合作都可以殺出一條血路㗎！