個個講韓風，左丁山曾經一度以為係寒風。與高官喺萬豪食午飯，傳媒老兵Ｍ講故事，好動聽。老兵Ｍ於一九六九年入行，攞過最佳記者獎，至今三十六年，仍然在傳媒機構主持節目，越戰越勇。佢講故事，由修頓球場公廁（非常乾淨）講起，講到閔大人一類好男人。左丁山立即問：「邊個係閔大人？」舉座皆笑，高官話：「原來你好out啫！」佢哋爭住解釋，閔大人係《大長今》嘅男主角。嚡，大班Ｃ嗰日講起，佢只睇過《大長今》大結局一集（因在酒樓與親戚食飯，人人爭睇電視，佢惟有睇埋一份），而左丁山半集都冇睇過。自己覺得時間如此寶貴，點解要花時間喺一啲於我無幫助嘅肥皂劇上面？
睇韓風學嘢不如睇今期《Fortune》（財富），封面故事就係講南韓三星之成功秘密（TheSecretsofSamsung'sSuccess-It'sallaboutbuildingacultureofperpetualcrisis）：秘密就係具備永恒之危機感、時時刻刻記住生於憂患、死於安樂。三星以前模仿新力（SONY），以新力為師，到咗二○○四年，三星嘅營業額增加31.5%，升到七百一十六億美元，歷史上第一次超越新力（營業額六百六十六億美元，增長0.4%），而三星賺九十四億美元，超過新力嘅純利十五億美元，新力於是低聲下氣，上門請教昔日徒弟，派人去三星學習。
三星總裁YunJong-Yong嘅格言係要生存不能不變：「強者未必可以倖存，最能適應者方可以取勝。」呢位Yun先生日日對員工講，三星隨時可以突然死亡，佢話：「你好愛你嘅太太，但最好日日對佢講一次我愛你！」正因為有危機感，佢不斷推動員工創新，適應市場，維持產品最高品質（佢話品質就是公司良心），停滯不前，為昨日成就自豪者，請鬆人！
睇完三星之成功故事特稿，左丁山記起一個人，就係肥佬黎，佢以前有同左丁山講過perpetualchange㗎。