數碼港出名寧靜又帶少少偏僻，拍拖唔錯，偷食最啱。因此亦成為明星新蒲點，喺度睇戲食飯直落無問題，鍾愛此地嘅有明星李嘉欣、譚校長等等。今日就去數碼港搵食，睇吓會唔會撞到明星，咦！嗰個咪係陳自瑤YoYo?!記者跟蹤佢半日，發現佢都嚟咗數碼港「偷食」！
記者：梁學文
攝影：梁細權
Model：陳自瑤Yoyo
化妝：MaggieLee
周莊水鄉──地道淮揚菜
一嚟到就見到YoYo一個箭步入咗去周莊水鄉。周莊水鄉位於數碼港商場三樓，開業個幾月，前身係中環堅道一間私房菜，因為經常供不應求，座位唔夠，近日就搬到數碼港。上海周莊有水鄉之稱，為配合水鄉主題，餐廳除了開設在望到海景嘅地方之外，店內都有好多流水嘅中式擺設。四層式的設計，令每層都可望到周圍的景色，增添開揚嘅感覺。全店裝潢富麗堂皇，家具中西合璧。而且樓底高，空間感十足。
這裏的菜式以地道淮揚菜為主，大廚偉哥是浙江寧波人，有三十幾年經驗：「我特登去上海周莊學廚，學習佢哋嘅地道煮法，招牌菜萬三元蹄就係其中之一，用料同煮法都保留當地特色。」
周莊水鄉（29896338）
地址：數碼港道100號數碼港商場304號舖
營業時間：11:30am-11:00pm
座位：約50個
油燜箭笋$48
箭笋又稱江蘇小竹笋，或清水小竹笋，質感爽口。一般上海菜味道較濃，這款是其中一款味道清淡的菜式。師傅用上等豉油去醃製箭笋，不過味道唔太鹹，保留了笋的味道。
萬三元蹄 $108/半隻、$238/全隻
此元蹄係因明代有錢人沈萬三愛吃而命名的，係呢度嘅招牌菜。元蹄用豬後腿做，用十幾款調味料燜足八個鐘頭，豬嘅肥油被逼出，非常甘香。元蹄入口甜甜哋好夠味，最好味梗係肥肥哋嘅豬皮啦！
水鄉炸響鈴$48
偉哥：「呢個菜好考師傅手勢，因為我哋用咗黃紮雲吞，好難做。」呢個炸雲吞外面脆脆哋，入面豬肉餡肉質鮮嫩，皮脆肉滑。食時最緊要係趁熱，否則入面嘅肉汁就會浸腍香脆嘅雲吞皮。
竹笙伴帶子 $15/件（4件起）
這款冷盤材料有竹笙、帶子、冬菇和甘笋，入口清涼，味道比較清淡，主要是突出帶子和竹笙的鮮味。呢個冷盤涼涼哋，啱晒天口熱時食。
奧壽司──日式壽司HighTea
飲完Cocktail，原來YoYo約咗班朋友去HighTea。佢哋揀咗奧壽司食日本嘢，一齊試吓日式和食。奧壽司以壽司與和食聞名，聽員工講，不時有明星來幫襯，例如Ella官恩娜。這裏每周均由日本空運新鮮海產，如活海膽等做刺身。店內裝潢以日式為主，全部餐枱均在日本訂製，以雲石打造而成，並刻上書法圖案作裝飾，增加店內和風氣息。
奧壽司（29896286）
地址：數碼港道100號數碼港商場307號舖
座位：約100個
營業時間：12:00nn-11:00pm
小食四點$40
按時令而更改的小食款式。今次就有三文魚、漬物盛、紫蘇海苔和芥辣八爪魚。當中以漬物盛由蒜頭漬、高菜漬和淮山漬三款漬物合製，各有特色；而紫蘇海苔就用較少見的紫蘇果醃製海苔，入口清爽。
象拔蚌沙律$78
用碎海蜇、青瓜片和蘿蔔片作配菜，加入新鮮象拔蚌作日式沙律，配以檸檬汁，味道酸酸哋，象拔蚌又爽口彈牙，係一款好開胃嘅沙律。
大葱雞肉串$35/2串
這裏的雞肉串並不如一般雞肉串，因為用上又大又肥美的黃油髀做雞串，所以雞串入口特別嫩滑有口感。雞串加入大葱一齊燒，大葱清香之餘又有咬口，味道一流。
食客有Say
奧壽司（29896286）
地址：數碼港道100號數碼港商場307號舖
座位：約100個
營業時間：12:00nn-11:00pm
揸車來食抵！
其實YoYo今次特別為我哋介紹數碼港，佢都係第一次來，行完佢話：「我幾鍾意呢度，貪佢夠靜，呢度如果揸車嚟，喺商場無論消費幾錢（無消費限額！）都享有兩個鐘頭泊車，抵！」
數碼港交通
交通：巴士M49、73、73P、970、107P，小巴69、69X、69A
泊車：凡在數碼港商場消費，即可享兩小時免費泊車