香港人個個工作繁忙，但論工時之長，大概冇乜人可與投資銀行家相比；靚女學生Ｂ返嚟香港放假一個月，玩MSN之時，碰上好多朋友online，發覺唔少同學都返咗香港做暑期工，因來自美國名校，個個都喺中環大機構工作；靚女Ｂ亦到中環做公關替工兩個星期，於是約朋友出嚟食午飯，約來約去，只得一位應約，個個都話太忙，食飯都冇時間喎。
佢位女同學話只得好短時間食午飯，約靚女B十二點半在長江中心樓下等，跟着行去萬國寶通大廈食三文治，食完即刻返公司，甚為匆忙，女同學在投資銀行返暑期工，有薪水、有屋住，條件甚優厚，但每日大清早返到公司，根本唔知道幾時可以放工，日日對住電腦計數、搵資料、輔助分析師或賓架寫報告，晚上十一點左右就知道可唔可以鬆人嘞。
暑期工如是，連班賓架亦然。大班Ｃ位千金在英國名校讀法律返嚟後入咗大投資銀行，在M&A（併購）部門工作，幾個月下來，大班Ｃ只會在早餐時候匆匆見個乖乖女一面，到晚上大班Ｃ要上床咯，乖乖女重未返到屋企！珠寶Ｓ位千金有同樣遭遇，做咗半年之後，Ｓ太唔捨得，喝令千金辭職，返家族公司幫父親辦事。Ｓ太嘅理由好簡單，既然個女有學識，工作又搏命，倒不如幫番老竇打工好過，起碼可以見面多啲！
中環有新酒店開張，大家爭持激烈，兩間酒店員工都做到儍，以至麻木咁滯，一來萬事起頭難，二來碰啱酒店業好好景，請熟練技工並不容易，請唔夠人都要趕死線（deadline）開張嘅啦，惟有人人一日開工起碼十四至十六小時，未開幕已做到殘。Ｔ局長位公子在無敵海景酒店負責F&B（餐飲），係酒店由紐約調佢返嚟嘅，聽講局長太太非常高興，高興之餘，見到乖乖仔日做夜又做，唔知會唔會諗起：都係做公務員最好呢？