鍾欣桐（阿嬌）入行四年以來從未在銀幕上咀過，最近與馮德倫合作新片《犀照》跨進一大步，可拍親面戲，至於阿嬌心中銀幕初吻的對象，則是日本萬人迷木村拓哉。
馮德倫、鍾欣桐及張志恆（Steven）日前在浙江橫店拍攝電影《犀照》外景，戲中馮德倫因含冤入獄，身為律師的阿嬌為他打官司，因而日久生情，不過二人最親熱的舉動只是親吻臉頰，嚴禁接吻，馮德倫說：「阿嬌唔拍得咀戲，係佢公司規矩，今次已經係一大進步。」
「死都要撐大眼」
Twins出道以來，只有蔡卓妍（阿Sa）拍過接吻戲，阿嬌至今仍未獻出銀幕初吻，她指這與二人形象不同有關，阿嬌說：「公司唔畀咀住，可能遲啲，又或者係秘密武器，不過將來嘅事冇人知，如果可以拍，我梗係想同木村咀啦！之前阿Sa同劉德華拍咀戲，竟然可以瞓着咗，如果我可以同木村咀，死都要撐大隻眼。」
「一碰埋就撞親頭」
問阿嬌會否希望試下拍接吻戲？她說：「我都唔知幾時，如果要等到三十歲先獻出銀幕初吻都唔係辦法，三十歲先見到我咀都幾好笑，不過我可以拍錫面戲已經有小小進步，前幾日就同馮德倫拍咗場錫面戲，點知一碰埋就撞到佢個頭，可能緊張過頭啦！如果真係拍咀戲可能會緊張到手震，入行四年先錫面，或者十五年後會有張床再加多張梳化。」
