已經搞到第三年的家居潮流博覽聽日開鑼，集合超過300個參展攤位，包括室內設計、影音、家電、燈飾等，啱晒需要一次過搜羅全屋家具用品的朋友。即使並非要大裝修，現場亦有唔少着數嘢值得一看，尤其是一直賣兩萬幾蚊一平方米嘅魔術玻璃，現在首度以半價發售。
撰文：李韻樂
攝影：梁細權
模特兒：Zita
魔術玻璃一秒變樣
一㩒掣，看似普通的透明玻璃立即變成磨砂玻璃咁，認真神奇！呢項由美國發明的設計，原理係於玻璃之間夾了一層薄膜，通電後產生化學作用，即會變成奶白色。
雖然此發明面世已有一段日子，但由於價錢貴（初推出時每平方米約售$30,000），暫見於商業用途居多，今次以接近半價推出市面。咁過癮，就算唔買，睇吓都好。
有乜好
1.活動牆壁
近期家居設計極度流行使用玻璃代替石屎牆壁，魔術玻璃可做出靈活牆壁的間隔作用，一㩒掣即時變出私人空間。
2.遮光隔熱
玻璃框通電後可以遮光，同時有隔熱用途，筆者親歷實驗，在「磨砂」狀態下室溫跌了3至5度，用於廳房的落地玻璃，唔錯！
價錢：$13,000-$14,000/平方米
攤位：P10（新思維工程方案有限公司）
尋找着數攤位
$89呎全屋家具套餐
新居入伙或裝修？全屋2房連客飯廳家具套餐，包括電視地櫃、茶几、鞋櫃、餐桌連椅、雙人床、衣櫃、書枱等等，每呎$89啱唔啱？現場還送出$500現金券可以即用。
攤位：N16-N36 （正斗室內設計）
免費睇風水
請師傅返屋企睇風水，閒閒哋都要過千，今次會場請到柏天心師傅為大家免費睇家居風水，各位只須攜同家居圖則，柏師傅便會為大家解答各項家居風水問題，重可獲贈家居風水光碟一隻。
攤位：N12（時福國際有限公司）
冷風機送收音機
Innotec嬌小玲瓏冷風機，三重過濾淨化空氣，設計省電，備遙控。
攤位：K07及K09（西進國際市務有限公司）
智能廁板送按摩花灑
韓國設計的Spalet智能廁板，有成20種功能，特備女性專用清潔系統，並可做出節奏震動的按摩水流，又可開啟溫暖坐板，保用兩年，更有7日免費試用，唔啱嘅話，原銀奉還！特價之餘，會送埋坐廁（包安裝），亦可揀按摩花灑，分別價值約$3,300。
攤位：H24（傲威潔具有限公司）
呢個攤位好矚目睇全球最高衣櫃
2004年被列入「健力士世界紀錄大全」，堪稱全球最高之衣櫃（高15呎），足有雙層巴士咁高。
攤位：K02-K06（皇室實業有限公司）
