數碼影音：<br>全球首部黑膠直過CD$3,380一機搞掂

數碼影音：
全球首部黑膠直過CD$3,380一機搞掂

香港有一班熱愛黑膠唱片嘅人，可能呢啲黑膠已經係絕版珍藏，唔單止好難同朋友分享，想話拎出街或者喺車裏面播，都唔係容易，最近記者發現TEAC推出咗一部可以將黑膠唱片直接錄成CD嘅TEACGF-350，唔單止係全球首部有咁嘅功能嘅黑膠機，價錢重只係$3,380，黑膠發燒友點都要入番部！

記者：梁瑋瑜
攝影：黃子偉　
ImageGirl：YanYeung（ISIS）

呢個年代成長嘅人，對於音樂嘅概念可能係電腦硬碟裏面喺互聯網下載嘅MP3，唔需要付出、唔需要珍惜，但係對於60、70年代成長嘅人嚟講，儲錢買張黑膠唱片，珍而重之咁將佢放入唱盤度播，過程中嘅滿足感，點會喺MP3度搵到？今時今日可以俾你重溫番當年嘅黑膠碟，重可以錄落CD度，GF-350絕對係黑膠珍藏者嘅一大喜訊。

$3,380（推出日期：10月中）

■想就咁聽番黑膠，呢部機一樣得。

木製機身交足貨

喺中環專門售賣黑膠唱片嘅三通音樂負責人DavidLee話，其實之前都有其他可以外接唱盤轉錄CD嘅機，不過當中做唔到CD最後嘅Finalise程序，而且要駁嚟駁去始終唔太方便，而呢部TEACGF-350就係第一部一機搞掂嘅音響組合，而且四千蚊有找，好多人都負擔得到。
TEACGF-350機身採用木質製成，完全交足貨，更加增加咗佢嘅懷舊Feel，打開機頂揭蓋之後，就會見到唱盤同埋唱針，用嚟齋聽黑膠都一樣得，而且重有33、45、78三個轉速畀大家選擇，不過如果使用內置嘅喇叭，音質就比較一般，可惜又唔可以外接其他喇叭，可能會有到喉唔到肺嘅感覺。

■有AUX-In，用家可以接駁其他更靚唱盤錄碟。

■全木機箱，勁懷舊Feel。

■內置喇叭音質一般。

直錄CD分Track都得

嚟到戲肉嘅「轉CD程序」，首先大家要預備一隻空白嘅CD-R，而呢隻CD-R要印有「DIGITALAUDIO」呢個標誌（各大電腦場有售，約$10），咁先可以保留最高水準嘅音質，將CD-R放入CD盤裏面，再將唱針放上心愛嘅黑膠唱片上，呢個時候就可以按Record掣開始錄音，喺每首歌之間用家可以按TrackIncrement，咁歌曲就會分成一首首唔同Track咁錄落CD度，成個錄CD過程係RealTime進行嘅，方便大家邊聽邊錄，最後完成之後㩒番一個Finalise掣，就大功告成，以後鍾意嘅音樂，唔係淨係可以喺屋企部黑膠機上面聽喇！

■話咁快就整起隻CD！

■TrackIncrement同Finalise呢兩個掣，錄CD時好有用。

■記住認住有「DIGITALAUDIO」標誌先好買。

遙控器方便操作

呢部TEACGF-350除咗頭先講嘅黑膠播放、黑膠轉CD功能之外，重有埋FM收音機功能，多一個功能自然更加吸引啦，另外部機嘅顯示屏採用咗白色冷光背景，同一般同價嘅Hi-Fi組合唔同，感覺高貴得多，跟機重有一個遙控器，除咗操作CD播放之外，連錄CD嘅時間都可以喺Remote上面㩒TrackIncrement，真係好方便。

■冷光顯示屏夠有型。

■跟埋Remote，懷舊得嚟又玩現代。

■採用伸縮式CD盤。

■機面雖然好多掣，不過都好易用。

三通音樂負責人David

TEACGF-350價錢真係好抵，平時買個迷你音響組合都要呢個價錢啦！而且個轉CD過程又快又簡單，市面上又冇其他機可以做到，最難得嘅係轉出嚟嘅CD音質超靚，比一般發燒碟一啲都唔輸蝕，黑膠發燒友一定要入呢部機。