香港唔使開賭，窩輪市場賭味已經夠晒重，馬局長都開口講幾句。總之，得1粒子彈或者啲錢等住糴米嘅，唔適宜喺呢個賭場落注。
收市後，長和派成績表。長實（001）半年所賺相等於去年全年84%，和黃（013）半年所賺相等於去年全年73%。兩盤數應該獲得市場收貨，並為個市帶來少少陽光。
中石油C輪9088：中石油（857）升15仙，C輪（全部都係1份輪兌1股正股）理論上升盡都係升15仙，照對沖值計算，要打打折扣。但隻3500真係升夠15仙，跟足晒，收83仙，升幅22%。
3500成交金額6100萬元，係中石油次熱門C輪。9088係正印大熱門，成交金額超過1億，只升5仙，收46仙。3500咁升法，9088更加炒得過。
9088墮後，可能同街貨去到90%，驚住發行商增發有關。不過，隻輪現時發行量200球，就算增發若干，1日成交224球，都可以好易將啲貨消化晒。
睇番3500，發行量200球，街貨39%，街貨市值6500萬元，而9088街貨市值8300萬元，只係多過3500少少，但成交金額又多過3500好多。
橫計直計，炒中石油C輪，都係應該向9088埋手。
章盛