鍾麗緹近日被指與結婚兩年多的嚴振翔（Jon）感情出現問題，日前來港為MontBlanc拍攝硬照的她，昨日竟以「朋友」稱呼Jon，被問到夫婦關係時，則表示不想講；而Jon接受電話訪問時說：「我也不知道如何回答你，謝謝你的關心。」
久未在香港露面的鍾麗緹，近日傳出與丈夫嚴振翔感情出現問題，前晚八時多，頭戴白帽、身穿緊身T恤及黑褲的鍾麗緹，偕一名女伴現身中環IFC商場內的Harlan's高級餐廳，二人選了靠玻璃窗的卡位對坐，點了一支白酒一邊摸酒杯底一邊談心事，其間鍾麗緹喋喋不休，頻頻煲煙，神態輕鬆自若。
極速掃貨
銅鑼灣購泳衣唇膏
逗留約一小時，鍾麗緹結帳後與女伴乘坐的士往銅鑼灣時代廣場附近，二人先到MissSixty女裝專門店，由於店舖即將關門，她匆匆上樓揀泳衣及衣物，僅十五分鐘已掃貨完畢，再到旁邊的ShuUemura買唇膏後，便與女伴乘的士返回下榻的中環麗嘉酒店。其間有周刊記者為追訪鍾麗緹，一邊開車一邊手持DV機拍攝她在的士車廂內的情況。鍾麗緹到埗後便向該名周刊記者帶笑訓話道：「你知唔知頭先咁樣揸車好危險㗎？又要揸車又要拍DV。」
記者昨日致電Jon，問他為何沒有陪太太一起來港時，他說：「我在北京有工作。」問Jon是否知道鍾麗緹來港做甚麼？他說：「她好像今天就回來了吧，說實話我也不太清楚，工作安排是助手處理。」記者直接問他是否與鍾麗緹出現感情問題時，Jon大笑幾聲，說：「我也不知道如何回答你，謝謝你的關心。」
自稱女友
「畀五十萬我同你講」
其後記者再聯絡鍾麗緹，她在電話中說：「我今次返香港係幫MontBlanc影相，佢哋遲啲喺內地有一個一百周年嘅活動，我好耐冇返香港，今次順便約咗導演傾偈，今晚就會返北京。」
問鍾麗緹與丈夫的感情是否出現變化？她說：「你哋唔好煩我朋友啦，佢好忙，你打畀佢問佢我哋感情係咪有問題，咁樣好rude（不禮貌），本來我好掛住香港，但我嘅私事唔關你哋事，我講乜嘢你哋都亂寫，而且寫得好差，我同Jon啲嘢係我哋兩個人嘅事，點解要關心我哋嘅relationship（關係），我喺北京好開心，嚟緊諗住出書、開餐廳同唱歌，佢只係一個普通人，我唔想講，我哋好唔好，啲人都唔會關心啦。」
記者表示香港觀眾十分關心鍾麗緹的近況，當然亦包括感情生活，她說：「就係因為之前講太多，你知唔知講得多會影響，你知唔知我識得太多娛樂圈人分手就係因為你哋，我哋嘅關係唔關你哋事。我唔想講，係因為啲人鍾意聽唔開心嘅嘢。如果你畀錢，畀五十萬我，我出嚟同你慢慢講。」
記者指若鍾麗緹已回復單身，說出來後才會有其他男士追求，她即說：「係咩？啲人唔會追嘅喎，以前我冇老公，又唔見有多啲人追？」再問到她與Jon現時究竟是甚麼關係時，鍾麗緹說：「我咪係佢女朋友囉！」記者詫異地指她曾親口證實已經與Jon結婚，她說：「我之前講之嘛！我只可以話畀你聽我好健康，乜都好好，工作好好」
一見鍾情
前年結婚丈夫無業
記者事後再致電鍾麗緹，表示想搞清楚她與Jon是否已於○三年結婚時，她說：「我同佢係結咗婚，但我哋鍾意話係男朋友、女朋友，咁樣會feelfresh（保持新鮮感）。」但再問到她現時與Jon的關係是否良好時，鍾麗緹即表示不願多談。
現年三十四歲的鍾麗緹，○○年底在stareast於北京舉行的活動上認識Jon，二人一見鍾情，翌年鍾麗緹在Jon的故鄉北京以二百三十萬人民幣買下一間三千二百呎複式豪宅，○三年八月二人於加拿大蒙特利爾小鎮註冊結婚，婚後鍾麗緹曾透露計劃替Jon生孩子，可惜懷孕不足三個月已小產。
現年三十八歲的Jon曾留學美國，早年在台灣組成《黑月追風》樂隊出過兩張唱片，因銷量不佳拆夥後一直無業，因此有傳鍾麗緹一直在經濟上照顧對方。
採訪、攝影：張止寒、娛樂突發組
