成班人坐埋，話題多多，地產Ｗ問起點解星期五報紙娛樂版可以多到幾十版，新聞從何而來？大班Ｃ從來唔睇娛樂版，聽地產Ｗ咁講，唔多信，佢話：「吹水啫啩，我未睇過噃！」老細Ｌ證實確有其事，佢話唔少娛樂新聞都係設計新聞，既具八卦娛樂性，又有宣傳價值。話說一位女星突然暴肥，腩肉橫生，俾娛樂記者影到幅相，登咗出嚟，造成不大不小嘅轟動。
一間纖體公司立即簽咗女星做代言人，聲言六十日內減肥。六十日後，女星以新面貌示眾，嘩！竟然有Ｓ形身材，纖體公司威晒，達到宣傳效果，娛樂版大肆報道。老細Ｌ話，實情係大家一早夾定，女星不出現個幾月，日食夜又食，食到自己肥晒，故意着窄衫露臍露腩肉，「啱啱」俾記者影到相，見報後，就出第二招，做纖體代言人，再見報。第三招就係即時節食，做番運動，還原身體，見晒報，曝光十足！
公關Ｑ聽老細Ｌ咁講，笑笑口話：「我哋都有類似橋段。替某隻牌子宣傳，特別安排牌子老闆與女星到置地廣場咖啡店飲咖啡，嗰度係人都可以睇得到。然後向相熟娛樂版報料，話某某明星在置地廣場出現，與富裕男士密斟。記者立即撲到嚟，第二朝又有新聞見報，話男士係乜乜牌子老闆啦！」
唔怪得娛樂版有咁多「過癮」材料，普通讀者根本分唔出邊啲係真實，邊啲係編劇，總之一日有人睇、有人講，遊戲會繼續玩落去。
大班Ｃ對呢啲事甚為純情，聽到目瞪口呆。左丁山知一不知二，聽到津津有味，諗住他日可以偷橋。賓架Ａ問老細Ｌ：「喺學校你高我兩班，究竟上堂有冇教過呢類新聞學？」老細Ｌ大笑：「我帶着兩個mentee，都唔知點講呢類鋪排設計嘅新聞。自己未學過，唔敢教壞後生。」