楊愛瑾（Miki）近期捲入鄭中基與蔡卓妍（阿Sa）的緋聞中，令這段三角關係吵得熱烘烘，日前Miki接受訪問時力撐鄭中基非屬無賴，並大讚他人好易相處兼勤力，對他十分欣賞。
楊愛瑾與鄭中基兩番被踢爆夜會蒲吧及於酒吧內拖手仔，再加上鄭中基的緋聞女友蔡卓妍，三角關係變得撲朔迷離，日前Miki在中環接受本報訪問時，言談間句句幫着鄭中基，反而對阿Sa就顯得略有避忌。
問Miki對鄭中基印象如何？她即大讚說：「佢唔係報道中講到咁差，係嘅話就唔需要做得咁辛苦，《龍咁威2》有好多嘢佢都有份做，鍾意玩就唔使度咁多嘢啦。」提到鄭中基常被人形容為無賴，Miki又力撐說：「唔覺得，佢係一個幾易相處嘅人，佢欣賞一樣嘢嘅話，無論係咪實用都好，都會努力去鑽研。」
唔算識阿Sa
Miki揚言不介意再與鄭中基合作，但問到二人有否發展空間，她說：「唔會因為俾人講得多而變咗真嘅，朋友就係朋友，同佢一齊拍嘢係好開心，但我哋嘅感情係大哥哥同妹妹，佢教我好多嘢，佢係一個專業演員，學嘢好快，我都好想學吓佢嘅搞笑性格。」
二人緋聞傳得甚盛，Miki有否擔心會令阿Sa誤會？她說：「我唔知佢兩個嘅關係，但唔緊要，唔會尷尬嘅，大家做呢行，知道緋聞係乜嘢一回事。」但問到Miki是否認識阿Sa，她則說：「好少接觸，好少合作機會，佢會知我係邊個啩，其實唔算識佢。」
朋友不查問
至於Miki的緋聞男友徐天佑又曾否就鄭中基緋聞一事向Miki查問？她聞言即笑說：「冇問過我喎，個個朋友都冇問過我，唔想提呢啲事啦，激氣。」至於有否因緋聞而影響她與天佑的感情，Miki說：「唔會，感情一向都係咁，好朋友囉，我同每個朋友都好有默契，係朋友就唔會問呢啲無聊嘢啦。」
採訪：朱倬誼
攝影：陳偉權
化妝：DeborahVaughan
髮型：VincePang@IlColpo
服裝：SistyrMoon
場地：BalalaikaRussianRestaurant
