立法會議員詹培忠出名識飲識食，八方早前講過佢去咗四十二日環遊世界，噚日佢喺賭城打咗個電話返嚟報喜，話自己已經贏到團費，而且食到佳餚。
嗱，信唔信由得你，金勞詹話，佢上周由香港出發，去咗日本同三藩市，噚日到咗賭城拉斯維加斯，入住至豪嘅Mansion酒店，佢住間有三個套房嘅房間，有成萬呎大地方，連室內游泳池都有，真係誇張。
呢個唔算厲害，金勞詹重話，佢哋八個人，噚日食咗餐勁嘢，埋單承惠三萬美金（約二十四萬港元），比起當年佳寧娜陳松青喺香港福臨門一餐食咗十六萬港元重要貴，肯定破紀錄。八方問佢食咗乜咁巴閉？佢話，「咪係日本三頭鮑，𠵱家全世界都冇，只係有啲收藏咗喺美國。」當然佳餚少不了美酒啦。金勞詹一餐食咗打工仔半年人工，佢梗係冇有怕食得起，因為佢話自己喺賭場大有斬獲，賭百家樂贏咗成百萬美金，即係大約八百萬港元，真係非八方等一般人可以想像。
爆料熱線：29290000、27860099
報料傳真：26239278
報料電郵：[email protected]