徐小鳳同黃凱芹噚日齊齊去港台接受訪問，譚詠麟（阿倫）重打電話上節目同小鳳姐傾偈，小鳳姐問阿倫有冇預佢做演唱會嘉賓，重話：「求其畀一場我喺邊個位捐出嚟都得㗎嘞！」阿倫就話：「你捐畀我就梗係好啦！」小鳳姐即話：「唔係捐我畀你，係叫你畀個位我捐出嚟！」
有人提議不如小鳳姐同阿倫跳辣身舞，阿倫好抵死咁話：「小鳳姐條裙咁大條，點同佢跳辣身舞呀！」小鳳姐就話：「我就你囉，着便服企埋一邊睇你跳，我就唔會同你辣㗎啦。」
「攞身份證對吓」
小鳳姐之前話細阿倫一年，佢同阿倫講：「我想挑戰你（阿倫），你話你係五○年（出世），我係四九年，照計五十減四十九，我點都細你一年，我應該叫你做阿哥，但我唔信你係五○年，不如大家攞張身份證對吓，你敢唔敢吖？」阿倫聽完後只係哈哈大笑，平時口沒遮攔嘅佢竟然俾小鳳姐窒到冇聲出，你都咪話小鳳姐唔勁！
