淡友噚日繼續發功，大市中段雖曾一度打成平手，但結果都係要低收，恒指收14873，跌100點，成交又縮番到201億元；期指收報14826，跌121點，低水47點。
臨近月尾，期指開始轉倉，未來兩三個交易日將進入高潮。大戶㩒番低個市轉倉，照計後市再造上的機會較大，原本預期9月份嘅跌市可能不會出現。轉完倉後，大市會再升過，或可衝破15509的前高位，甚至向15800至15900區域推進。大戶搵食，冇1000點走棧，轉唔到身嘅。
大市急升後，回吐好正常，個人認為今次只係一次小調整，落到14700至14800會有支持，幾時見底回升，要看長和業績而定。若大市發展一如所料，創今浪新高後所出現的中期調整，幅度亦不會大，極其量去番14400至14600，就會定得住，年底前的上升大浪，恒指有機會上衝17000。
長和再大跌機會微
長實（001）同和黃（013）今日宣布中期業績，和黃雖有一次性的特殊收益達150億元，但仍未能完全抵銷3G的虧損；同時，在新會計制度下，投資物業重估收益多少，難以準確預測，3G虧損同物業重估收益兩大變數，令到大行對和黃盈利嘅估計有好大分歧，由賺70億到160億不等。
由於市場多看淡和黃嘅業績，但長和已跌定等宣布，只要盈利唔係預期咁低，相信長和再大跌嘅風險已唔大。
大市雖乏力，但上升股（不計認股證）仍有200隻。在兩日跌市中，銀建國際（171）的表現最硬朗，噚日逆市而升，收2.325元，升5仙，成交有340多萬股。睇走勢，銀建在低位嘅整固似有完成之勢，家吓股價已上番10日線（2.30元），下降軌同20日線阻力分別在2.35元同2.36元，升破後即可確認調整完成，升浪再展，初步目標係2.80元。
銀建現時處理緊兩個資產包，04年度（12月年結）小試牛刀，獲利4.05億元，大升122%，05年連同物業租金同基建項目收入，保守估計盈利可達6.5億元，每股盈利37仙，以PE11倍計，股價已可重上4元水平。
郭兆誠