個市繼續唔掂，跌幅細過18%嘅窩輪，都未能打入50大跌幅榜。早排有報章引述一啲統計數字，話8成炒輪者輸錢。近排，呢個輸錢比率相當反映實際情況。
中電信C輪4500：中電信C輪4500係波幅極大嘅窩輪，用8日時間，可以由26仙上到49.5仙，升幅9成（8月4日至16日），再用6日時間，由49.5仙碌到22仙，跌幅5成半。就如昨日，正股（728）唔見3格，隻輪就已經蒸發2成。
炒中電信C輪，低買高賣，4500係最啱對象，但要有思想準備，好短時間內贏20%同輸20%，機會一樣咁大，因為中電信每日上落3個位，4500已經有20%嘅變化。炒輪，幾時都要克制注碼。
中石化C輪4561：中石化（386）收市前1分鐘，大約有15球3.50元掛賣盤，唔使半分鐘，有10手1球或1.2球清板，重嘜過兩手共74萬股3.525元。埋單價3.50元，跌1格。
中石化似有料狀，短炒C輪4561有着數。隻輪收44.5仙，跌11%，跌到負溢價1.6%，槓桿率7.9倍（有效7.9倍）。下月尾夠鐘，負溢價負得太早。
章盛