大市呢排走勢真係好惡睇，今日適逢超人兩隻股份公布業績好日子，對股市開大定開細實在舉足輕重。
經紀黃話，如果捉唔到大市走勢嘅話，不如搵啲實力股份揸中線好過，話唔定會有驚喜。今次佢推介一上市就潛水嘅晨訊科技（2000），隻股掛牌首日就潛水，至今仍然未見到家鄉，但保母已經夠鐘可以出嚟做推介活動，如果芬佬肯埋位嘅話，股價應有機會造好，浮上招股價。
晨訊前日公布上市首個中期業績，盈利1.09億元，較上年同期勁升125%。經紀黃話，晨訊呢類喺大陸做手機設計及方案嘅公司，因為市場發展潛力大，所以盈利增長可以好驚人。雖然話大陸手機商競爭劇烈，但競爭主要集中在低檔市場，晨訊以中高檔市場為主，大陸同業一來唔夠技術爭，而外國公司又唔夠佢平。
晨訊今年6月以1.70元招股上市，最低跌至1.24元，公布業績前一度借消息炒上至1.64元，前日公布業績即刻回落，但昨日升番4%，收1.56元，成交1474萬元。
慕容小初