雖然以《機動戰士》為題材嘅遊戲推出過好多，不過今次嘅《SEEDDESTINYGENERATIONOFC.E.》特別之處，係動畫版還在播放時，就已經推出SLG遊戲版本，即係話玩家只要玩得夠快，就大有機會可以預先知道《SEED》嘅結局，而今集更加入好多《SEED》內特有場面同技能，加上超多高達機體，Fans必玩！
記者：許福合
有睇過《SEED》OVA，就會發現人設到故事背景與之前都好唔同，淨係出現咗咁多唔同款式高達就已經夠過癮，而今集遊戲就連最新最強，有三大主力機之稱嘅Freedom都會出現，講機動性同火力絕對係前列機種。
強化改裝機體
今集主要係戰棋式SLG玩法，當然唔少得強化裝備呢個元素，而要強化機體，需要消耗「金錢」，喺遊戲內就以TP代表，每次完成版面，玩家就可以檢查獲得多少TP，用來將機體進化升級，經過改造機體喺戰鬥之中能發揮更大戰力，武器方面改進更可大大提高攻擊力，可以由一般4千多提高至7千。機體改進能力分為6大項目，分別有HP、EN、武器、防禦、機動及移動，唔同機種特性唔同，升級優先都會唔同，筆者就比較愛先提升攻力，打得比較爽快！除咗以上6項，玩家還可以更改機體地形適應性，呢點好重要，事關遊戲會陸續出現唔同嘅地形，如飛行性佳嘅機體，去到水中作戰，戰力會大幅降低，所以要達成完美機體，地形方面都唔可以忽略。
機種互相克制
雖然動畫一開始就出現唔同陣營所製造嘅高達，不過遊戲初期可以選擇操控嘅唔多，要大約玩到中期開始，機種數量就明顯提高，所以Fans要用到心愛機種，就要有啲耐性喇！玩戰棋類遊戲，第一件事梗係要分清機種屬於近戰定遠攻，喺遊戲內更會出現互相克制嘅情況，近戰可克制中距離機種，中距離又可勝過遠攻機，但倒過來遠攻機又可克近戰，所以出戰時，研究一下敵人排陣，挑選合適機種就能打得更有效率。講到眾多機種中，性質比較特別就要數戰艦，既有可攻擊多個目標嘅大炮，又可替戰機補給，非常好用，不過同時亦成為敵人嘅打擊目標，而且每當被打下，就等同Gameover，所以筆者通常都放喺敵人攻擊範圍之外，安全啲好。
主角特殊能力
睇高達動畫時，駕駛員好多都會有超能力，係危機之中突然會發揮出超水準能力，今集遊戲都加入主角們特殊能力系統，最簡單先數PA，隨住角色等級提升，就能學到同等PA，PA能力可經手動或隨機啟動，手動發動筆者就發覺比較好，除咗可因應時機使用，最重要係有時PA效果可維持數個回合，可大大提升作戰能力！另一種特殊能力就需要用家「手動」發動，要喺戰鬥中發動呢種能力，就要順序按畫面顯示輸入□、△、○、×，成功後就可以大幅提高主角各方面基本能力值，戰力可以話係幾何級數上升，所以一定要加以利用。
遊戲資料
主機：PS2
開發：BANDAI
類型：SLG
遊戲人數：1人
售價：$495
