大戶周二借花旗美邦唱淡長和系，將大市一舉質破15000大關，噚日再力壓地產股及中海油（883），將恒指進一步質穿14900。
大市由8月16日高位15508下調至昨日低位14861，6日內調整達647點，調整幅度已不算少。近期淡友意氣風發，將衍生工具發行商牽住鼻走，形勢上較佔上風。不過，淡友應該唔威得好耐，市場游資充裕，相信好友只係暫時休息，任由淡友幫手震一震倉，待14800個底打實後，然再出手炒上都未遲。
周二拖累大跌市嘅長和系今日公布業績，睇吓會否有出乎意料之外的不利因素，令花旗睇得咁淡。其實市場一直對長和系評價唔差，高盛早前曾調高長實（001）及和黃（013）目標價至98元及101元。
金威啤（124）宣布，喜力已終止洽商增持金威啤股權，股價大跌7.8%至2.65元。金威啤話，由今年1月20日開始，喜力一直就洽商增持金威啤權益而與廣東控股進行商談，但自7月21日起並無重大進展，因而終止洽商，以減少金威啤的不明朗因素。但金威啤消除咗呢個不明朗因素後，反而令股民失望。
真樂發虛驚一場
其實自從有關洽商曝光後，金威啤個個月都要公布有關洽商的進展，但個個月都話冇進展，人力物力都浪費唔少，其實廣東控股本來就無意售股，咁樣邊有得傾呢？早就應該宣布終止洽商啦。不過，今次終止唔代表永遠冇得傾，金威啤股民唔使太失望。
真樂發（1003）澄清未就注資交易簽訂任何意向書或合約，股價一度跌12%至0.104元，但當市場意識到冇簽意向書，唔代表日後唔會獲得注資後，股價立即低位反彈，收報0.117元，僅跌0.84%。
阿虎